فتنۃ الہندوستان کے سہولت کاروں کا دہشت گرد عناصر سے لاتعلقی کا اعلان، اہم انکشافات سامنے آگئے

کوئٹہ: تربت سے تعلق رکھنے والے محمد سہیل بہرام اور محمد عرف مہروان نے فتنۃ الہندوستان سے لاتعلقی کا اعلان کرتے ہوئے ریاست پاکستان سے وفاداری کا عہد کیا ہے۔

پریس کانفرنس کے دوران دونوں افراد نے دعویٰ کیا کہ سوشل میڈیا کے ذریعے ان کا رابطہ کالعدم بی ایل اے سے وابستہ ثابت عرف کماندان سے ہوا، جس کے بعد وہ سیکیورٹی فورسز پر حملوں کے لیے تنظیم کی سہولت کاری کرتے رہے۔

دونوں افراد نے اپنے سابقہ کردار پر افسوس کا اظہار کرتے ہوئے کہا کہ وہ پاکستان سے غداری اور دہشت گرد عناصر کا ساتھ دینے پر شرمندہ ہیں۔ انہوں نے آئندہ کسی دہشت گرد تنظیم سے رابطہ نہ رکھنے کے عزم کا اظہار کرتے ہوئے نوجوانوں پر بھی زور دیا کہ وہ ایسی تنظیموں سے دور رہیں۔

بیان میں مزید کہا گیا کہ دہشت گرد تنظیموں سے لاتعلقی کے اعلانات بلوچستان میں بدامنی کے خلاف بڑھتی ہوئی مخالفت کی عکاسی کرتے ہیں۔