امریکا ایران معاہدے کے قریب، امریکی نمائندے ٹام بیرک نے قطر اور پاکستان کی کوششوں کا اعتراف کرلیا

امریکی نمائندے ٹام بیرک نے کہا ہے کہ امریکا اور ایران ابتدائی سفارتی مفاہمت کے قریب پہنچ چکے ہیں۔ انہوں نے کشیدگی کم کرنے کے لیے پاکستان اور قطر کی سفارتی کوششوں کو سراہتے ہوئے دونوں ممالک کے کردار کا اعتراف کیا ہے۔

ٹام بیرک نے ایک انٹرویو میں کہا کہ خطے کے ممالک نے واشنگٹن اور تہران کے درمیان کشیدگی کم کرنے اور مذاکرات کا راستہ کھولنے میں مدد فراہم کی ہے۔

انہوں نے امریکا اور ایران پر زور دیا کہ وہ عارضی طور پر فوجی کارروائیاں روک دیں تاکہ خطے میں کشیدگی کم کرنے اور سفارتی حل کی جانب پیش رفت کا موقع مل سکے۔

امریکی نمائندے کے مطابق عارضی جنگ بندی سے تنازع فوری طور پر ختم نہیں ہوگا، تاہم اس سے وسیع تر سیاسی حل کی راہ ہموار کرنے میں مدد مل سکتی ہے۔

تاحال امریکا اور ایران کے درمیان کسی حتمی معاہدے کا اعلان نہیں کیا گیا، تاہم ٹام بیرک کے بیان کو سفارتی کوششوں میں پیش رفت کے اشارے کے طور پر دیکھا جا رہا ہے۔