گنداواہ: چہلم حضرت امام حسینؑ کا مرکزی ماتمی جلوس سخت سیکیورٹی میں برآمد

گنداواہ(رپورٹ شیر احمد ساسولی نمائندہ صحافت) مرکزی امام بارگاہ نقویہ گنداواہ سے چہلم حضرت امام حسینؑ کا مرکزی ماتمی جلوس سخت سیکیورٹی انتظامات کے ساتھ برآمد ہو گیا۔
ماتمی جلوس کی قیادت مرکزی امام بارگاہ نقویہ گنداواہ کے متولی سید فرزند علی شاہ بخاری کر رہے ہیں۔ جلوس اپنے روایتی راستوں سے ہوتا ہوا مقررہ منزل کی جانب رواں دواں ہے، جبکہ عزادار حضرت امام حسینؑ اور شہدائے کربلا کو پرسہ پیش کرنے کے لیے بڑی تعداد میں شریک ہیں۔
چہلم کے موقع پر مختلف امام بارگاہوں اور مقامات پر عزاداروں کے لیے ٹھنڈے پانی کی سبیلیں اور لنگر کا وسیع انتظام کیا گیا ہے۔
ضلعی انتظامیہ کی جانب سے جلوس کی سیکیورٹی کے لیے سخت انتظامات کیے گئے ہیں۔ پولیس فورس، اسپیشل برانچ، دیگر قانون نافذ کرنے والے ادارے اور المہدی اسکاؤٹس کے رضاکار حفاظتی فرائض انجام دے رہے ہیں۔
اس کے علاوہ ڈی ایچ کیو ہسپتال گنداواہ کے افسران، ڈاکٹرز، پیرامیڈیکل اسٹاف اور ایمبولینس سروس کو بھی ہائی الرٹ رکھا گیا ہے تاکہ کسی بھی ہنگامی صورتحال سے فوری طور پر نمٹا جا سکے۔
چہلم حضرت امام حسینؑ کے موقع پر گنداواہ میں عقیدت، احترام اور پرامن ماحول کے ساتھ عزاداری کا سلسلہ جاری ہے۔