بوستان کلی چوکل میں فائرنگ کے تبادلے میں 13 سالہ بچہ جاں بحق، کوئٹہ ژوب قومی شاہراہ بند

پشین: بوستان کلی چوکل کے علاقے میں دو گروپوں کے درمیان فائرنگ کے تبادلے کے دوران 13 سالہ بچہ جاں بحق ہوگیا۔

ذرائع کے مطابق واقعے کے بعد مقتول بچے کے لواحقین نے احتجاج کرتے ہوئے بوستان کراس کے قریب کوئٹہ ژوب قومی شاہراہ کو ہر قسم کی ٹریفک کے لیے بند کر دیا۔

شاہراہ کی بندش کے باعث دونوں اطراف گاڑیوں کی لمبی قطاریں لگ گئیں، جس سے مسافروں اور ٹرانسپورٹرز کو شدید مشکلات کا سامنا کرنا پڑا۔

واقعے کے بعد پولیس اور دیگر متعلقہ ادارے موقع پر پہنچ گئے جبکہ صورتحال کو قابو میں کرنے اور شاہراہ بحال کرنے کے لیے اقدامات جاری ہیں۔