مستونگ: قومی شاہراہ پر فائرنگ، سیشن جج عبدالحکیم کاکڑ اور گن مین شہید

مستونگ: بلوچستان کے ضلع مستونگ میں قومی شاہراہ پر نامعلوم مسلح افراد کی فائرنگ سے سیشن جج عبدالحکیم کاکڑ اور ان کے گن مین شہید جبکہ جوڈیشل مجسٹریٹ سمیت دو افراد زخمی ہوگئے۔

ابتدائی اطلاعات کے مطابق حملہ آور واردات کے بعد موقع سے فرار ہوگئے۔ واقعے کے فوراً بعد پولیس اور دیگر قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا۔

شہداء کی لاشوں اور زخمیوں کو قریبی اسپتال منتقل کر دیا گیا، جہاں زخمیوں کو طبی امداد فراہم کی جا رہی ہے۔

واقعے کے بعد عدالتی اور وکلا حلقوں میں شدید تشویش پائی جا رہی ہے۔ حکام کا کہنا ہے کہ حملہ آوروں کی گرفتاری کے لیے کارروائی جاری ہے، جبکہ واقعے کی نوعیت اور محرکات جاننے کے لیے تحقیقات شروع کر دی گئی ہیں۔

ادھر مختلف حلقوں نے حکومت سے مطالبہ کیا ہے کہ واقعے میں ملوث عناصر کو فوری گرفتار کر کے قانون کے کٹہرے میں لایا جائے اور بلوچستان میں عدلیہ کے ارکان سمیت اہم سرکاری شخصیات کی سکیورٹی مزید مؤثر بنائی جائے۔