مہمند میں سکیورٹی فورسز کی گاڑی پر بم حملہ، ایف سی کے 3 اہلکار شہید

ضلع مہمند: تحصیل صافی کے علاقے میں سکیورٹی فورسز کی گاڑی کے قریب بم دھماکے کے نتیجے میں فرنٹیئر کانسٹیبلری (ایف سی) کے 3 اہلکار شہید جبکہ 5 زخمی ہوگئے۔

ذرائع کے مطابق واقعہ تھانہ لکڑے کی حدود میں مامد گٹ کیمپ روڈ پر پیش آیا، جہاں 114 بریگیڈ کی سکواڈ ٹیم گزر رہی تھی۔ راستے میں نصب دیسی ساختہ بم (آئی ای ڈی) کے دھماکے سے گاڑی کو شدید نقصان پہنچا۔

دھماکے کے بعد سکیورٹی فورسز اور امدادی ٹیمیں فوری طور پر موقع پر پہنچ گئیں اور شہید اہلکاروں کی لاشوں اور زخمیوں کو اسپتال منتقل کیا گیا۔ زخمیوں میں بعض کی حالت تشویشناک بتائی جا رہی ہے۔

واقعے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، جبکہ حملے میں ملوث عناصر کی تلاش جاری ہے۔