عالمی منڈی میں خام تیل کی بڑھتی قیمتوں نے متعدد اسٹاک ایکسچینجز کو ہلا کر رکھ دیا

نیویارک: امریکا اور ایران کے درمیان بڑھتی ہوئی کشیدگی کے باعث عالمی مالیاتی منڈیوں میں بے چینی پیدا ہوگئی ہے، جبکہ خام تیل کی قیمتیں کئی ماہ کی بلند ترین سطح پر پہنچ گئی ہیں۔

عالمی مارکیٹ میں برینٹ خام تیل تقریباً 4 فیصد اضافے کے بعد 87.33 ڈالر فی بیرل تک پہنچ گیا، جبکہ امریکی ویسٹ ٹیکساس انٹرمیڈیٹ (WTI) بھی اضافے کے بعد 82.09 ڈالر فی بیرل پر ٹریڈ کرتا رہا۔

ماہرین کے مطابق مشرق وسطیٰ میں بڑھتے ہوئے جغرافیائی و سیاسی خطرات کے باعث سرمایہ کاروں نے توانائی کی قیمتوں میں مزید اضافے کے خدشے کے پیش نظر خریداری بڑھا دی ہے۔

خام تیل کے ساتھ دیگر توانائی مصنوعات، جن میں گیس اور ایل این جی شامل ہیں، کی قیمتوں میں بھی اضافہ ریکارڈ کیا گیا۔ ماہرین کا کہنا ہے کہ اگر آبنائے ہرمز کے ذریعے تیل کی ترسیل متاثر ہوئی تو عالمی توانائی بحران مزید شدت اختیار کر سکتا ہے۔

تیل کی قیمتوں میں اضافے کے باعث امریکا، یورپ اور ایشیا کی کئی اسٹاک مارکیٹس دباؤ میں آگئیں، جبکہ سرمایہ کار محتاط رویہ اختیار کر رہے ہیں۔

اقتصادی ماہرین کے مطابق اگر خام تیل کی قیمتیں 90 ڈالر فی بیرل کے قریب برقرار رہیں تو پاکستان جیسے درآمدی ممالک کو درآمدی بل میں اضافے، روپے پر دباؤ اور مہنگائی میں اضافے جیسے چیلنجز کا سامنا کرنا پڑ سکتا ہے۔