دہشتگردی کا کوئی جواز نہیں، بلوچستان کے 4 ہزار طلبہ سے وزیراعلیٰ سرفراز بگٹی کا مکالمہ

کوئٹہ: وزیراعلیٰ بلوچستان سرفراز بگٹی نے کہا ہے کہ دہشتگردی اور تشدد کی کسی بھی صورت میں کوئی گنجائش یا جواز نہیں، جبکہ نوجوان نسل کو سوشل میڈیا پر پھیلنے والی گمراہ کن معلومات اور پروپیگنڈے سے محتاط رہنے کی ضرورت ہے۔

آئی ایس پی آر کے زیر اہتمام سمر کیمپ 2026 کے دوران وزیراعلیٰ بلوچستان نے صوبے کے 18 شہروں سے تعلق رکھنے والے نویں سے بارہویں جماعت کے 4 ہزار سے زائد طلبہ سے براہِ راست سوال و جواب کی نشست میں شرکت کی۔

اس موقع پر سرفراز بگٹی نے بلوچستان میں امن و امان، دہشتگردی، نوجوانوں کے کردار، قومی سلامتی اور ترقیاتی منصوبوں سمیت مختلف امور پر طلبہ کے سوالات کے جوابات دیے۔

وزیراعلیٰ نے کہا کہ دہشتگردی سے سب سے زیادہ نقصان بلوچستان کے عوام نے برداشت کیا ہے۔ ان کے مطابق دہشتگرد عناصر نے ان لوگوں کو بھی نشانہ بنایا جنہوں نے ان کی حمایت سے انکار کیا، جس سے ثابت ہوتا ہے کہ دہشتگردی کا پہلا نشانہ مقامی آبادی ہی بنتی ہے۔

انہوں نے کہا کہ بلوچستان میں جاری ترقیاتی منصوبے بھی دہشتگردوں کے نشانے پر رہے ہیں، کیونکہ ایسے عناصر صوبے کی ترقی اور عوامی فلاح کے منصوبوں کو متاثر کرنا چاہتے ہیں۔

سرفراز بگٹی نے طلبہ پر زور دیا کہ وہ کسی بھی خبر یا بیانیے کو بغیر تحقیق قبول نہ کریں، کیونکہ غلط معلومات اور پروپیگنڈا معاشرے کو گمراہ کرنے کے لیے استعمال کیے جاتے ہیں۔

انہوں نے بتایا کہ حالیہ پولیس حملے کی تحقیقات کے لیے عدالتی کمیشن قائم کیا جا چکا ہے تاکہ ذمہ داروں کا تعین کرکے قانون کے مطابق کارروائی کی جا سکے۔

وزیراعلیٰ بلوچستان نے نوجوانوں کو مخاطب کرتے ہوئے کہا کہ صوبے اور ملک کا مستقبل تعلیم، تحقیق، مثبت سوچ اور قومی یکجہتی سے وابستہ ہے۔ انہوں نے اس عزم کا اظہار کیا کہ پاکستان اور بلوچستان کا مستقبل امن، ترقی اور اتحاد کے راستے سے ہی روشن ہوگا۔