ازبکستان کے نائب وزیراعظم آج پاکستان پہنچیں گے، ٹرانزٹ ٹریڈ معاہدے میں بڑی پیش رفت متوقع

اسلام آباد: ازبکستان کے نائب وزیراعظم جمشید خوجائیف آج پاکستان پہنچیں گے جہاں وہ 20 اور 21 جولائی کو دو روزہ سرکاری دورے کے دوران اہم ملاقاتیں کریں گے۔

ذرائع کے مطابق دورے کے دوران پاکستان اور ازبکستان کے درمیان ٹرانزٹ ٹریڈ معاہدے کو مزید مؤثر بنانے کے لیے اہم پیش رفت متوقع ہے، جبکہ معاہدے میں توسیع اور ترامیم سے متعلق پروٹوکول پر دستخط کا امکان بھی ہے۔

مجوزہ انتظامات کے تحت چین کوریڈور کو اضافی تجارتی راستے کے طور پر شامل کیا جائے گا، جس کا مقصد خطے کی صورتحال کے باوجود دونوں ممالک کے درمیان تجارتی سرگرمیوں اور سامان کی نقل و حمل کو بلا تعطل جاری رکھنا ہے۔

اس معاہدے کے تحت پاکستان کو وسطی ایشیائی ریاستوں تک رسائی میں سہولت ملے گی، جبکہ ازبکستان کو پاکستانی بندرگاہوں کے ذریعے عالمی منڈیوں تک رسائی حاصل رہے گی۔

دورے کے دوران تجارت، سرمایہ کاری، ٹرانسپورٹ، لاجسٹکس اور علاقائی روابط کے فروغ سمیت مختلف امور پر تفصیلی تبادلہ خیال کیا جائے گا۔ دونوں ممالک کے درمیان پانچ سالہ تجارتی و اقتصادی تعاون کے روڈ میپ پر بھی بات چیت متوقع ہے۔

اس موقع پر بزنس ٹو بزنس فورم کا انعقاد بھی کیا جائے گا، جس میں ازبکستان کی 100 سے زائد کمپنیوں کے نمائندگان شرکت کریں گے۔