بلوچستان انویسٹمنٹ ایکسپو 2026 صوبے کی ترقی کا نیا باب ثابت ہوگی، بلال خان کاکڑ

۔:بلوچستان سرمایہ کاری بورڈ کے وائس چیئرمین بلال خان کاکڑ نے کہا ہے کہ وزیر اعلیٰ بلوچستان میر سرفراز بگٹی کے وژن کے مطابق بلوچستان میں سرمایہ کاری، تجارت، صنعت اور روزگار کے فروغ کے لیے بلوچستان بورڈ آف انویسٹمنٹ اینڈ ٹریڈ نے مختصر عرصے میں نمایاں کامیابیاں حاصل کی ہیں، جن کے مثبت اثرات صوبے کی معیشت پر نمایاں طور پر مرتب ہو رہے ہیں۔انہوں نے کہا کہ بلوچستان کی تاریخ میں پہلی مرتبہ منعقد ہونے والی بلوچستان انویسٹمنٹ اینڈ ٹریڈ ایکسپو (BITE 2026)صوبے کی سرمایہ کاری، تجارت، صنعت، سیاحت، معدنی وسائل اور کاروباری مواقع کو عالمی سطح پر اجاگر کرنے کا ایک تاریخی پلیٹ فارم ثابت ہوگی۔ اس ایونٹ کے ذریعے ملکی و غیر ملکی سرمایہ کار، کاروباری شخصیات، مالیاتی ادارے، جامعات اور ترقیاتی شراکت دار ایک چھت تلے جمع ہوں گے، جس سے نئی سرمایہ کاری، مشترکہ منصوبوں اور روزگار کے وسیع مواقع پیدا ہوں گے۔بلال خان کاکڑ نے کہا کہ بلوچستان قدرتی وسائل، جغرافیائی اہمیت، ساحلی پٹی، معدنی ذخائر، زرعی صلاحیت اور نوجوان افرادی قوت کے اعتبار سے سرمایہ کاری کے بے پناہ مواقع رکھتا ہے۔ حکومت بلوچستان اور بلوچستان بورڈ آف انویسٹمنٹ اینڈ ٹریڈ سرمایہ کاروں کو ہر ممکن سہولت، شفاف پالیسی اور مکمل ادارہ جاتی معاونت فراہم کرنے کے لیے پرعزم ہیں۔انہوں نے کہا کہ بلوچستان کی ترقی صرف سرکاری کوششوں سے ممکن نہیں بلکہ نجی شعبے، سرمایہ کاروں، کاروباری برادری، جامعات اور ترقیاتی شراکت داروں کے باہمی تعاون سے ہی صوبے کو معاشی خودمختاری، صنعتی ترقی اور پائیدار خوشحالی کی راہ پر گامزن کیا جا سکتا ہے۔