کیپٹن کرنل شیر خان شہید کی قربانی عسکری تاریخ کا روشن باب ہے،وزیر اعلیٰ بلوچستان

کوئٹہ: وزیر اعلیٰ بلوچستان میر سرفراز بگٹی نے نشانِ حیدر کے حامل کیپٹن کرنل شیر خان شہید کے 27ویں یومِ شہادت پر انہیں زبردست خراجِ عقیدت پیش کرتے ہوئے کہا ہے کہ ان کی لازوال قربانی پاکستان کی عسکری تاریخ کا ایک روشن اور سنہری باب ہے۔

اپنے خصوصی پیغام میں وزیر اعلیٰ نے کہا کہ کیپٹن کرنل شیر خان شہید نے انتہائی نامساعد حالات میں بے مثال جرات، بہادری، فرض شناسی اور وطن سے وفاداری کا عملی مظاہرہ کرتے ہوئے دشمن کے خلاف ایسی مثال قائم کی جو ہمیشہ یاد رکھی جائے گی۔

میر سرفراز بگٹی نے کہا کہ وطن کا دفاع ہر پاکستانی کا مقدس فریضہ ہے اور شہداء کی عظیم قربانیوں کی بدولت پاکستان آج امن، آزادی اور خودمختاری کے ساتھ قائم ہے۔ انہوں نے کہا کہ قوم اپنے شہداء کی قربانیوں کو کبھی فراموش نہیں کر سکتی، کیونکہ یہی قربانیاں آنے والی نسلوں کے لیے مشعلِ راہ ہیں۔

وزیر اعلیٰ بلوچستان نے اس عزم کا اعادہ کیا کہ حکومت بلوچستان اور صوبے کے عوام ہر بیرونی اور اندرونی خطرے کے مقابلے میں اپنی بہادر مسلح افواج کے شانہ بشانہ کھڑے ہیں اور ملکی سلامتی، استحکام اور دفاع کے لیے کسی بھی قربانی سے دریغ نہیں کریں گے۔