بلوچستان حکومت میں شمولیت کی دعوت، جے یو آئی کی مجلسِ عاملہ کا اہم اجلاس جاری

کوئٹہ: جمعیت علمائے اسلام (جے یو آئی) بلوچستان کی مجلسِ عاملہ اور پارلیمانی اراکین کا مشترکہ اجلاس صوبائی امیر سینیٹر مولانا عبدالواسع کی صدارت میں جاری ہے، جبکہ اجلاس کی نظامت صوبائی ناظمِ عمومی آغا محمود شاہ کر رہے ہیں۔

ذرائع کے مطابق اجلاس میں چیئرمین پاکستان پیپلز پارٹی بلاول بھٹو زرداری کی جانب سے جمعیت علمائے اسلام کو بلوچستان حکومت میں شمولیت کی دی گئی دعوت پر تفصیلی مشاورت کی جا رہی ہے۔

ذرائع کا کہنا ہے کہ اجلاس میں حکومت میں شمولیت سے متعلق مختلف پہلوؤں کا جائزہ لیا جا رہا ہے، تاہم تاحال اس حوالے سے کوئی حتمی فیصلہ سامنے نہیں آیا۔

اجلاس کے اختتام پر متوقع فیصلے سے متعلق پارٹی کی جانب سے باضابطہ اعلان کیے جانے کا امکان ہے۔