جمعیت علماء اسلام نے ہمیشہ عوامی حقوق کے لیے جدوجہد کی ہے، مولانا محمد خان لاشاری

گنداخہ 🙁 نامہ نگار) جمعیت علماء اسلام ضلع جھل مگسی کے سابق ضلعی امیر مولانا محمد خان لاشاری نے کہا ہے کہ جمعیت علماء اسلام نے ہمیشہ عوامی حقوق کے تحفظ، علاقائی ترقی اور اجتماعی مفادات کے فروغ کو اپنی سیاست کا محور بنایا ہے اور آئندہ بھی عوامی خدمت کا یہ سفر پوری ذمہ داری کے ساتھ جاری رکھا جائے گا۔ان خیالات کا اظہار انہوں نے آئی این پی کے نمائندہ محمد رفیق پندرانی سے ملاقات کے دوران کیا۔ ملاقات میں جماعتی امور، ملکی و علاقائی سیاسی صورتحال، ضلع جھل مگسی کو درپیش مسائل اور دیگر اہم معاملات پر تفصیلی تبادلہ خیال کیا گیا۔مولانا محمد خان لاشاری نے کہا کہ اپنے دورِ امارت میں انہوں نے عوامی مسائل کو ہر فورم پر اجاگر کیا، متعلقہ حکام اور اداروں تک عوام کی آواز پہنچائی اور بنیادی مسائل کے حل کے لیے بھرپور جدوجہد کی۔ انہوں نے کہا کہ جمعیت علماء اسلام نے ہمیشہ ذاتی اور گروہی مفادات کے بجائے عوامی فلاح و بہبود کو ترجیح دی ہے اور ہر سطح پر عوام کے حقوق کے لیے مؤثر آواز بلند کی ہے۔انہوں نے کہا کہ ضلع جھل مگسی کے عوام کے اعتماد پر پورا اترنا جماعت کی اولین ترجیح ہے۔ عوام کے مسائل کا عملی حل انصاف کی فراہمی، ترقیاتی عمل میں تیزی اور علاقائی حقوق کا حصول جمعیت علماء اسلام کے بنیادی مقاصد میں شامل ہے۔ انہوں نے کہا کہ جماعت نے ہر مشکل گھڑی میں عوام کا ساتھ دیا ہے اور مستقبل میں بھی عوامی خدمت، اتحاد و اتفاق کے فروغ اور علاقے کی خوشحالی کے لیے اپنی جدوجہد مزید مؤثر انداز میں جاری رکھے گی۔