موسیٰ خیل میں نامعلوم مسلح افراد کی فائرنگ سے صحافی لالا اسرافیل شہید

موسیٰ خیل نجی ٹی وی چینل سے وابستہ صحافی لالا اسرافیل کو نامعلوم مسلح افراد نے فائرنگ کرکے شہید کر دیا۔ واقعہ مرکزی جامع مسجد کے قریب ان کی دکان کے سامنے پیش آیا جس سے علاقے میں خوف و ہراس پھیل گیا

جائے وقوعہ پر موجود مقتول کے چھوٹے بھائی کے مطابق مسلح افراد نے لالا اسرافیل پر فائرنگ کی جس کے بعد حملہ آور ڈاکٹرز والی گلی کی جانب فرار ہو گئے

واقعے کی اطلاع ملتے ہی پولیس موقع پر پہنچ گئی اور شواہد اکٹھے کرکے کارروائی کا آغاز کر دیا۔ ایس ایچ او محمد خان کے مطابق لالا اسرافیل کی لاش پوسٹ مارٹم کے لیے سول ہسپتال منتقل کر دی گئی ہے

لالا اسرافیل کی شہادت سے نہ صرف ان کے اہلِ خانہ بلکہ صحافتی برادری اور پورا موسیٰ خیل غم میں ڈوب گیا ہے۔ عوامی مسائل محرومیوں اور عام لوگوں کی آواز کو ایوانوں تک پہنچانے والی ایک نڈر اور بے باک آواز ہمیشہ کے لیے خاموش ہو گئی ان کی شہادت سے پیدا ہونے والا خلا شاید ہی کبھی پُر نہ ہو سکے
مقامی شہریوں اور صحافی برادری نے اس المناک واقعے پر گہرے رنج و غم کا اظہار کرتے ہوئے کہا کہ لالا اسرافیل ایک مخلص عوام دوست اور پیشہ ور صحافی تھے جنہوں نے ہمیشہ حق اور سچ کی آواز بلند کی۔ ان کی شہادت موسیٰ خیل کے لیے ایک بڑا نقصان ہے اور ان کی خدمات ہمیشہ یاد رکھی جائیں گے