سیکیورٹی خدشات کے باعث کوئٹہ میں موبائل انٹرنیٹ سروس عارضی طور پر معطل

کوئٹہ (ویب ڈیسک): معاون برائے داخلہ حکومت بلوچستان بابر یوسفزئی نے کہا ہے کہ کوئٹہ شہر میں بعض سیکیورٹی خدشات کے پیشِ نظر موبائل انٹرنیٹ سروس کو چند گھنٹوں کے لیے عارضی طور پر معطل کیا گیا ہے۔

انہوں نے اپنے بیان میں کہا کہ عوام کی جان و مال کا تحفظ حکومت کی اولین ترجیح ہے اور یہ اقدام بھی شہریوں کی سلامتی کو یقینی بنانے کے لیے اٹھایا گیا ہے۔ بابر یوسفزئی نے موبائل انٹرنیٹ سروس کی عارضی بندش سے عوام کو پیش آنے والی مشکلات پر معذرت کا اظہار کرتے ہوئے کہا کہ حالات معمول پر آتے ہی سروس بحال کر دی جائے گی۔

معاون برائے داخلہ نے شہریوں سے اپیل کی کہ وہ افواہوں پر کان نہ دھریں اور ذمہ دارانہ رویہ اختیار کرتے ہوئے قانون نافذ کرنے والے اداروں کے ساتھ تعاون کریں۔