زرعی واجبات کی وصولی ہر صورت یقینی بنائی جائے، غفلت برداشت نہیں ہوگی مڈپٹی کمشنر خالد خان

جعفرآباد: ڈپٹی کمشنر جعفرآباد خالد خان کی زیر صدارت زرعی واجبات کی وصولی کے حوالے سے ایک اہم ریونیو اجلاس منعقد ہوا جس میں محکمہ ریونیو کے افسران اور عملہ مال نے شرکت کی۔ اجلاس میں زرعی واجبات کی وصولی کے عمل کا تفصیلی جائزہ لیا گیا اور موجودہ پیش رفت پر غور کرتے ہوئے اہداف کے حصول کو یقینی بنانے کے لیے مختلف اقدامات پر تبادلہ خیال کیا گیا۔ اس موقع پر افسران نے ڈپٹی کمشنر کو سرکاری وصولیوں کے حوالے سے بریفنگ دیتے ہوئے بتایا کہ واجبات کی بروقت وصولی کے لیے فیلڈ میں اقدامات تیز کر دیے گئے ہیں جبکہ نادہندگان کے خلاف قانونی کارروائی بھی عمل میں لائی جا رہی ہے۔ ڈپٹی کمشنر خالد خان نے اجلاس سے خطاب کرتے ہوئے ہدایت کی کہ زرعی واجبات کی وصولی کو ہر صورت یقینی بنایا جائے اور اس سلسلے میں کسی قسم کی غفلت یا کوتاہی برداشت نہیں کی جائے گی۔ انہوں نے کہا کہ ریونیو نظام کی بہتری اور سرکاری وسائل میں اضافے کے لیے واجبات کی بروقت وصولی انتہائی اہم ہے لہٰذا تمام متعلقہ افسران اپنی ذمہ داریاں احسن طریقے سے انجام دیں۔ انہوں نے مزید تاکید کی کہ فیلڈ اسٹاف اپنی کارکردگی بہتر بنائے اور نادہندگان کے خلاف بلاامتیاز کارروائی عمل میں لائی جائے تاکہ مقررہ اہداف حاصل کیے جا سکیں۔ اجلاس میں یہ بھی فیصلہ کیا گیا کہ وصولیوں کے عمل کی مسلسل نگرانی کی جائے گی اور کارکردگی کا باقاعدہ جائزہ لیا جائے گا تاکہ نظام کو مزید موثر بنایا جا سکے۔