جم میں ورزش کے دوران نوجوان فالج کا شکار، وجوہات اور بچاؤ کی تدابیر جانیے

صحت: بھارت کے شہر ناگپور میں ایک افسوسناک واقعہ پیش آیا جہاں 23 سالہ نوجوان جم میں سخت ورزش کے دوران دماغی شریان پھٹنے کے باعث فالج کا شکار ہو گیا۔ اگرچہ بروقت طبی امداد سے اس کی جان بچ گئی، تاہم واقعے نے فٹنس کے شوقین افراد کے لیے خطرے کی گھنٹی بجا دی ہے۔

طبی ماہرین کے مطابق ورزش جسم کے لیے فائدہ مند ضرور ہے، لیکن حد سے زیادہ جسمانی مشقت اور آرام کی کمی سنگین صحت کے مسائل کا باعث بن سکتی ہے۔ نیورولوجسٹ ڈاکٹر ونیت بنگا کے مطابق انسانی جسم کی برداشت کی ایک حد ہوتی ہے، جسے نظر انداز کرنا نقصان دہ ثابت ہو سکتا ہے۔

ماہرین کا کہنا ہے کہ ورزش دراصل جسم پر ایک “کنٹرولڈ اسٹریس” ہوتی ہے، لیکن اگر اسے مسلسل بڑھایا جائے اور مناسب ریکوری نہ دی جائے تو جسم کی مرمت کا نظام متاثر ہو جاتا ہے، جس سے پٹھوں کی چوٹیں، ہارمونی عدم توازن اور مدافعتی نظام کی کمزوری پیدا ہو سکتی ہے۔

رپورٹ کے مطابق اوور ٹریننگ کے دوران اسٹریس ہارمون (کورٹیسول) کی سطح بڑھ جاتی ہے، جس سے تھکن، بے چینی، چڑچڑاپن اور نیند کی خرابی جیسے مسائل سامنے آتے ہیں۔ بعض صورتوں میں پانی کی کمی اور بلڈ پریشر کے اتار چڑھاؤ کے باعث دماغی پیچیدگیاں اور فالج کا خطرہ بھی بڑھ سکتا ہے۔

ماہرین نے “اوورٹریننگ سنڈروم” کو بھی خطرناک قرار دیا ہے، جس میں مسلسل تھکن، کارکردگی میں کمی اور جسمانی کمزوری شامل ہے، اور اس سے بحالی کے لیے طویل آرام درکار ہوتا ہے۔