وزیر داخلہ محسن نقوی کی ڈپلومیٹک انکلیو میں امریکی سفارتخانے آمد، امریکی سفیر سے ملاقات

وفاقی وزیر داخلہ محسن نقوی نے اسلام آباد کے ڈپلومیٹک انکلیو میں امریکی سفارتخانے کا دورہ کیا جہاں انہوں نے امریکی سفیر نیٹلی بیکر سے ملاقات کی۔

ملاقات کے دوران پاک۔امریکا تعلقات کے فروغ اور خطے کی تازہ ترین صورتحال پر تفصیلی تبادلہ خیال کیا گیا، جبکہ اسلام آباد میں متوقع مذاکرات کے دوسرے دور کے لیے سیکیورٹی انتظامات بھی زیر بحث آئے۔

امریکی سفیر نے خطے میں کشیدگی کم کرنے کے لیے پاکستان کے مثبت اور مخلصانہ کردار کو سراہا۔

اس موقع پر محسن نقوی نے امریکی سفیر کو سیکیورٹی اقدامات سے آگاہ کرتے ہوئے کہا کہ تمام معزز مہمانوں کے لیے خصوصی اور فول پروف انتظامات کیے گئے ہیں، اور حکومت مذاکرات کے کامیاب انعقاد کے لیے پرعزم ہے۔

انہوں نے مذاکرات کی کامیابی کے لیے نیک خواہشات کا اظہار بھی کیا۔

ملاقات میں ڈی جی ایف آئی اے ڈاکٹر عثمان انور، چیف کمشنر اسلام آباد سہیل اشرف، آئی جی اسلام آباد پولیس علی ناصر رضوی اور ڈپٹی کمشنر عرفان میمن بھی شریک تھے۔