بنوں: سیکیورٹی فورسز کا خفیہ اطلاع پر انٹیلی جنس بیسڈ آپریشن، فتنہ الخوارج کے 2 دہشتگرد ہلاک

بنوں میں سیکیورٹی فورسز نے خفیہ اطلاع پر انٹیلی جنس بیسڈ آپریشن کرتے ہوئے فتنہ الخوارج سے تعلق رکھنے والے 2 دہشتگردوں کو ہلاک کر دیا۔ شدید فائرنگ کے تبادلے کے بعد مارے جانے والوں میں اہم کمانڈر بھی شامل ہے۔

پاک فوج کے شعبہ تعلقات عامہ (آئی ایس پی آر) کے مطابق ہلاک دہشتگردوں میں خارجی رنگ کا لیڈر وحید اللہ عرف مکتیار اور ایک خودکش بمبار شامل ہے۔ کارروائی کے دوران دہشتگردوں سے خودکش جیکٹ، اسلحہ اور گولہ بارود بھی برآمد کیا گیا۔

ترجمان کے مطابق ہلاک ہونے والا دہشتگرد رہنما سیکیورٹی فورسز اور شہریوں پر متعدد حملوں میں ملوث اور انتہائی مطلوب تھا۔ وہ 21 فروری 2026 کو بنوں میں ہونے والے خودکش حملے کا بھی مرکزی سہولت کار تھا، جس میں لیفٹیننٹ کرنل گل فراز شہید ہوئے تھے۔

آئی ایس پی آر کا کہنا ہے کہ اس کامیاب آپریشن سے نہ صرف ایک بڑے دہشتگرد نیٹ ورک کو دھچکا پہنچا بلکہ بروقت کارروائی کے باعث ممکنہ بڑی تباہی کو بھی ٹال دیا گیا۔ علاقے میں مزید دہشتگردوں کے خاتمے کے لیے کلیئرنس اور سینیٹائزیشن آپریشن جاری ہے۔

دوسری جانب وفاقی وزیر داخلہ محسن نقوی نے کامیاب کارروائی پر سیکیورٹی فورسز کو خراج تحسین پیش کرتے ہوئے کہا کہ قوم کو اپنے بہادر جوانوں پر فخر ہے اور ملک کے دفاع کے لیے ان کی قربانیاں ناقابلِ فراموش ہیں۔