انڈیا کی ریاست آندھرا پردیش میں اس وقت ایک دلچسپ بحث جاری ہے جس کی وجہ مردوں کے ’ختنہ کی کارروائیاں‘ قرار دی جا رہی ہیں۔
واضح رہے کہ طبی ضروریات کے علاوہ مسلمان اور یہودی برادریوں میں لوگ مذہبی وجوہات کی بنا پر ختنہ کراتے ہیں۔
تاہم انڈیا میں اس بحث نے ایک نیا موڑ اُس وقت لیا جب سی بی آئی کے سابق ڈائریکٹر ناگیشورا راؤ نے ریاست کے وزیر صحت کو ایک خط لکھا، جس میں الزام لگایا گیا کہ آندھرا پردیش میں ایک سکیم کے تحت ختنے کرنے کے عمل میں اضافہ ہوا۔
ناگیشورا راؤ نے الزام لگایا کہ ’وہ طبی وجوہات کی آڑ میں غیر مسلموں کے ختنے کر کے مذہبی ایجنڈے کو نافذ کر رہے ہیں۔‘
تاہم ریاست کے وزیر صحت نے کہا کہ تحقیقات کے بعد معاملہ درست پایا گیا تو کارروائی کی جائے گی۔
بعض ماہرین نے بی بی سی کو بتایا کہ یہ الزامات درست نہیں ہو سکتے اور ایسی کوئی صورتحال نہیں ہو گی کہ کوئی ڈاکٹر غیر ضروری طور پر یہ آپریشن کرے۔
