وزیراعظم اور صدر ایران کے درمیان ٹیلیفونک رابطہ، امن کوششوں پر ایک گھنٹے تک تفصیلی تبادلہ خیال

وزیراعظم محمد شہباز شریف نے آج اسلامی جمہوریہ ایران کے صدر ڈاکٹر مسعود پزشکیان سے ٹیلیفون پر گفتگو کی، جو پچھلے ایک ہفتے کے دوران دونوں رہنماؤں کے درمیان دوسرا رابطہ تھا۔

وزیراعظم سے جاری اعلامیہ کے مطابق گفتگو ایک گھنٹے سے زائد جاری رہی، جس میں خطے میں کشیدگی اور امن کی کوششوں پر تفصیلی تبادلہ خیال کیا گیا۔ شہباز شریف نے ایران پر اسرائیل کے تازہ حملوں، خصوصاً شہری تنصیبات پر، شدید مذمت کی اور ایرانی عوام کے ساتھ پاکستان کی مکمل یکجہتی اور حمایت کا اظہار کیا۔

وزیراعظم نے ایرانی صدر کو اپنی، نائب وزیراعظم اسحاق ڈار اور فیلڈ مارشل سید عاصم منیر کی جانب سے امریکہ، خلیجی اور اسلامی ممالک کے ساتھ جاری سفارتی رابطوں سے آگاہ کیا، جن کا مقصد امن مذاکرات کے لیے سازگار ماحول پیدا کرنا ہے۔ انہوں نے امید ظاہر کی کہ اجتماعی کوششوں سے کشیدگی کے خاتمے کی مؤثر راہ نکلے گی۔

ایرانی صدر نے پاکستان کی مخلصانہ سفارتی کاوشوں کو سراہا اور مذاکرات و ثالثی کے لیے اعتماد سازی کی ضرورت پر زور دیا۔ وزیراعظم نے یقین دہانی کرائی کہ پاکستان خطے میں امن اور استحکام کے فروغ کے لیے اپنا تعمیری کردار جاری رکھے گا۔