مشرق وسطیٰ تنازع: سعودیہ، ترکیے اور مصر کے وزرائے خارجہ سے کل اہم ملاقات ہوگی، اسحاق ڈار کی تصدیق

نائب وزیراعظم و وزیر خارجہ اسحاق ڈار نے تصدیق کی ہے کہ سعودی عرب، ترکی اور مصر کے وزرائے خارجہ کل اسلام آباد میں اہم ملاقات کریں گے۔ تینوں ممالک کے وزرائے خارجہ اگلے روز وزیراعظم شہباز شریف سے بھی ملاقات کریں گے۔

جیونیوز سے خصوصی گفتگو میں اسحاق ڈار نے بتایا کہ یہ ملاقات دراصل ترکی میں طے تھی، مگر مصروفیات کے باعث اسلام آباد میں بلائی گئی۔ انہوں نے کہا کہ پاکستان ایمانداری اور نیک نیتی کے ساتھ مشرق وسطیٰ تنازع ختم کرنے کی کوشش کر رہا ہے اور تمام دوست ممالک بھرپور تعاون فراہم کر رہے ہیں۔

اسحاق ڈار نے مزید کہا کہ ایران سے بات چیت جاری ہے اور مذاکرات کے باعث میڈیا میں تفصیلی بیانات دینے سے گریز کیا جا رہا ہے۔ اس سے قبل امریکا نے جنگ بندی کے لیے پاکستان کے ذریعے ایران کو 15 نکاتی فارمولہ پیش کیا تھا، جس کی ایران نے تصدیق کی اور اپنا جواب بھی پاکستان کے ذریعے امریکا تک پہنچایا۔