وفاقی حکومت نے ترقیاتی بجٹ میں 100 ارب روپےکی بڑی کٹوتی کر دی و

اسلام آباد: وفاقی حکومت نے مالی سال کے دوران ترقیاتی اخراجات میں بڑی کمی کرتے ہوئے پبلک سیکٹر ڈویلپمنٹ پروگرام (پی ایس ڈی پی) کے بجٹ میں 100 ارب روپے کی کٹوتی کر دی ہے۔

وفاقی وزیر برائے منصوبہ بندی احسن اقبال نے اس فیصلے کی تصدیق کرتے ہوئے بتایا کہ وزارت خزانہ کی جانب سے یہ کمی کی گئی ہے، جس کے تحت تمام جاری ترقیاتی منصوبوں کے فنڈز میں 10 فیصد تک کٹوتی کی جائے گی۔

اس فیصلے کے بعد رواں مالی سال کے لیے وفاقی ترقیاتی بجٹ کا مجموعی حجم ایک ہزار ارب روپے سے کم ہو کر 900 ارب روپے رہ گیا ہے۔

حکومتی ذرائع کے مطابق عالمی مارکیٹ میں قیمتوں میں اضافے کے باوجود پیٹرول اور ڈیزل کی قیمتیں برقرار رکھنے کے باعث حکومت اب تک 72 ارب روپے کی سبسڈی برداشت کر چکی ہے۔

وزیراعظم نے بھی اپنے حالیہ خطاب میں عندیہ دیا تھا کہ عوام کو ریلیف دینے کے لیے ایندھن کی قیمتوں کا بوجھ منتقل نہیں کیا گیا، جس کے نتیجے میں ترقیاتی بجٹ میں کمی ناگزیر ہو گئی۔