دل اور دماغ کا محافظ: ’معجزاتی‘ فوائد کا حامل مالٹے کا جوس، مگر اس کا استعمال کب اور کتنا کیا جائے؟

پاکستان میں آج کل مالٹے اور کینو کا سیزن اپنے عروج پر ہے اور موسم سرما میں بہت سے افراد مالٹے کا تازہ جوس پینے کو ترجیح دیتے ہیں۔ مالٹے کا جوس پینے کی عادت آپ کی صحت پر نمایاں اثر ڈال سکتی ہے۔

بہت سے لوگ ناشتے کے وقت تازہ مالٹے کا جوس پینا پسند کرتے ہیں، لیکن گذشتہ کچھ عرصے سے یہ مشروب تنقید کا نشانہ بھی بنتا آیا ہے۔ ماہرین خبردار کرتے ہیں کہ اگرچہ مالٹے وٹامنز سے بھرپور ہوتے ہیں، مگر جوس کی شکل میں ان کا استعمال خون میں شوگر کی اچانک زیادتی کا باعث بنتا ہے اور وقت کے ساتھ روزانہ ہونے والی شوگر کی یہ زیادتی انسولین ریزسٹنس (انسولین کے خلاف مزاحمت) پیدا کر سکتی ہے، جس سے ذیابیطس، دل کی بیماری اور موٹاپے کا خطرہ بڑھ جاتا ہے۔

تاہم نئی تحقیق یہ ظاہر کرتی ہے کہ مالٹے کے جوس میں زیادہ شوگر کے باوجود روزانہ اس کا ایک گلاس استعمال کرنا کئی طبی فوائد بھی فراہم کر سکتا ہے۔
طویل المدتی مطالعات، جن میں ہزاروں افراد کو برسوں تک ٹریک کیا گیا، یہ ظاہر کرتے ہیں کہ زیادہ تر سِٹرَس پھل (تُرش پھل جیسا کہ مالٹا، کینو) کھانے والے افراد میں دل کی بیماریوں اور فالج کا خطرہ کم ہوتا ہے۔ لیکن ان مطالعات میں زیادہ تر افراد سے پھل کھانے کے بارے میں پوچھا گیا ناکہ ترش پھلوں کا جوس پینے کے بارے میں۔ ماہرین کے مطابق پورا پھل دانتوں کی مدد سے کھانے اور اس کا جوس پینے کے اثرات جسم پر بالکل مختلف ہو سکتے ہیں۔

امپیریل کالج لندن کے غذائی سائنسدان فیڈریکو اماتی کہتے ہیں کہ ’اگر آپ دو یا تین مالٹے کھائیں، جو ایک چھوٹے گلاس جوس کے برابر ہیں، تو انھیں کھانے اور چبانے میں وقت لگے گا۔‘ وہ مزید کہتے ہیں کہ ’زیادہ تر لوگ شاید دو یا تین مالٹے کھانا پسند نہ کریں، لیکن ایک چھوٹا جوس کا گلاس وہ چند سیکنڈ میں ختم کر دیتے ہیں۔‘