فرقہ واریت اور پروپیگنڈا کا سختی سے مقابلہ کیا جائے گا، آرمی چیف

راولپنڈی میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے اہلِ تشیع مکتبِ فکر کے علماء نے ملاقات کی، جس میں قومی سلامتی، فرقہ وارانہ ہم آہنگی اور معاشرتی استحکام سے متعلق امور پر تفصیلی گفتگو کی گئی۔

فیلڈ مارشل نے اس موقع پر علماء کے کردار کو انتہائی اہم قرار دیتے ہوئے کہا کہ معاشرے میں اتحاد، برداشت اور قومی یکجہتی کے فروغ کے لیے مشترکہ کوششیں ناگزیر ہیں۔ انہوں نے واضح کیا کہ گمراہ کن پروپیگنڈا اور فرقہ واریت کا بھرپور مقابلہ کیا جائے گا۔

آئی ایس پی آر کے مطابق ملاقات میں اس امر پر بھی زور دیا گیا کہ مذہبی رہنما انتہا پسندی کے خاتمے اور امن کے قیام میں مثبت کردار ادا کریں۔

فیلڈ مارشل نے آپریشن “غضب للحق” کا حوالہ دیتے ہوئے کہا کہ پاکستان اپنی سرزمین کے خلاف دہشت گردی کے لیے کسی بھی ملک کی زمین کے استعمال کو برداشت نہیں کرے گا۔ انہوں نے کہا کہ دہشت گردوں اور ان کے نیٹ ورکس کے خلاف انٹیلی جنس بنیادوں پر مؤثر کارروائیاں جاری رہیں گی۔

انہوں نے افغان حکام پر زور دیا کہ وہ اپنی سرزمین کو پاکستان کے خلاف استعمال ہونے سے روکیں، جبکہ یہ بھی واضح کیا کہ بیرونی واقعات کو بنیاد بنا کر ملک کے اندر تشدد کسی صورت برداشت نہیں کیا جائے گا۔

ملاقات میں شریک علماء نے بھی امن، استحکام اور بین المسالک ہم آہنگی کے فروغ کے عزم کا اعادہ کیا اور قانون نافذ کرنے والے اداروں کے ساتھ مکمل تعاون کی یقین دہانی کرائی۔