لکی مروت؛ پولیس پر حملے میں ایس ایچ او سمیت 7 اہل کار جاں بحق

لکی مروت میں پولیس پر ہونے والے حملے میں تھانہ شادی خیل کے ایس ایچ او سمیت 7 پولیس اہلکار جاں بحق ہو گئے ہیں جبکہ متعدد زخمیوں کو اسپتال منتقل کر دیا گیا ہے۔

ایکسپریس نیوز کے مطابق دھماکا پولیس موبائل کے قریب ہوا اور ابتدائی اطلاعات کے مطابق یہ آئی ای ڈی بم کے ذریعے کیا گیا۔ جاں بحق ہونے والوں میں ایس ایچ او صدر اعظم، کانسٹیبل شاہ بہرام (ڈرائیور)، کانسٹیبل شاہ خالد، کانسٹیبل حاجی محمد، کانسٹیبل گل زادہ اور کانسٹیبل سخی زادہ شامل ہیں۔ زخمی کانسٹیبل انصاف الدین کو فوری طبی امداد کے لیے اسپتال منتقل کیا گیا۔

واقعے کی اطلاع ملتے ہی امدادی ٹیمیں جائے حادثہ پر پہنچ گئیں اور زخمیوں کو اسپتال منتقل کیا گیا۔

وزیر اعلیٰ خیبرپختونخوا Suhail Afridi نے حملے کا نوٹس لیتے ہوئے واقعے کی شدید مذمت کی اور آئی جی پولیس سے رپورٹ طلب کر لی۔ انہوں نے کہا کہ ایس ایچ او سمیت 7 اہلکاروں کی شہادت انتہائی افسوسناک ہے اور صوبائی حکومت شہداء کے اہل خانہ کے ساتھ مکمل یکجہتی کے لیے کھڑی ہے۔

وزیر اعلیٰ نے زخمیوں کو بہترین طبی سہولیات فراہم کرنے کی ہدایت دی اور کہا کہ دہشت گردوں کی بزدلانہ کارروائیاں ہمارے حوصلے پست نہیں کر سکتیں۔