پاکستان کا مشرق وسطیٰ میں مستقل جنگ بندی اور مذاکرات کا عمل دوبارہ شروع کرنے کا مطالبہ

اقوامِ متحدہ میں پاکستان کے مستقل مندوب عاصم افتخار احمد نے مشرقِ وسطیٰ میں فوری طور پر دشمنیوں کے خاتمے اور مستقل جنگ بندی کے قیام پر زور دیتے ہوئے ایران کے جوہری مسئلے کے پرامن حل کی حمایت کا اعادہ کیا ہے۔

سلامتی کونسل میں 1737 کمیٹی (ایران) پر بریفنگ کے دوران انہوں نے تمام فریقین سے اپیل کی کہ وہ انتہائی تحمل کا مظاہرہ کریں اور مزید کشیدگی سے گریز کریں، کیونکہ خطے میں امن کے لیے مذاکراتی عمل کا دوبارہ آغاز ناگزیر ہے۔

اپنے خطاب میں انہوں نے یاد دلایا کہ گزشتہ سال جولائی میں سلامتی کونسل نے متفقہ طور پر قرارداد 2788 منظور کی تھی، جس میں تنازعات کے حل کے لیے پرامن ذرائع کو بنیادی اہمیت دی گئی تھی۔ ان کا کہنا تھا کہ اقوامِ متحدہ کے منشور اور اس قرارداد کی روح کو دوبارہ فعال کرنا ہوگا تاکہ خطے میں بڑھتی ہوئی کشیدگی کو کم کیا جا سکے اور تشدد کے اس خطرناک سلسلے کو روکا جا سکے جو گزشتہ برسوں میں بار بار اس علاقے کو اپنی لپیٹ میں لیتا رہا ہے۔

عاصم افتخار احمد نے کہا کہ سلامتی کونسل اب بھی 1737 کمیٹی کے معاملے پر منقسم ہے اور یہ اختلاف ذیلی اداروں کے چیئرمینوں کی تقرری میں بھی رکاوٹ بن رہا ہے، جس سے ان اداروں کی کارکردگی متاثر ہو رہی ہے۔

انہوں نے زور دیا کہ 1737 کمیٹی سے متعلق امور کو سلامتی کونسل اور اس کے ذیلی اداروں کے معمول کے کام میں رکاوٹ نہیں بننے دینا چاہیے۔ انہوں نے یہ بھی نشاندہی کی کہ اس معاملے پر رپورٹ کے حوالے سے اتفاقِ رائے نہ ہونا افسوسناک ہے، حالانکہ یہی رپورٹ آج کے اجلاس کی بنیاد بن سکتی تھی۔

پاکستانی سفیر نے مزید کہا کہ گزشتہ جون کے بعد ہونے والی پیش رفت اور ایران پر بلااشتعال حملوں سے پیدا ہونے والی صورتحال نے ایران کے جوہری پروگرام سے متعلق عالمی تناظر کو بھی متاثر کیا ہے۔