مستحق شہری کے علاج، روزگار اور بنیادی سہولیات سے محرومی برداشت نہیں کریں گے، وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے کہا ہے کہ ریاست کی ذمہ داری ہے کہ مشکل وقت میں اپنے شہریوں کا ساتھ دے، بلوچستان کا کوئی بھی مستحق شہری علاج، روزگار اور بنیادی سہولیات سے محروم نہیں رہنا چاہیے۔

وزیراعلیٰ میر سرفراز بگٹی سے بینائی سے محروم شہری محمد زاہد نے ملاقات کی، اس موقع پر وزیراعلیٰ نے ان کے آنکھوں کے علاج اور بینائی کی بحالی کے لیے مکمل تعاون کی یقین دہانی کرائی۔

میر سرفراز بگٹی نے کہا کہ اگر محمد زاہد کا علاج لندن، امریکہ، دبئی یا دنیا کے کسی بھی ملک میں ممکن ہوا تو حکومت بلوچستان ان کے علاج کا انتظام کرے گی۔

وزیراعلیٰ نے کہا کہ کوئی مستحق شہری خود کو تنہا محسوس نہ کرے، معذوری صلاحیتوں اور خود اعتمادی میں کمی کا سبب نہیں بنتی۔ ایسے افراد کو باعزت زندگی اور خود کفیل روزگار کے مواقع فراہم کرنا ہماری ذمہ داری ہے۔

انہوں نے کہا کہ انسانیت کی خدمت ہمارا مشن ہے اور حکومت کی کوشش ہے کہ بلوچستان کا کوئی مستحق شہری علاج، روزگار اور بنیادی سہولیات سے محروم نہ رہے۔