مستحق لوگوں کو ایل پی جی پر بی آئی ایس پی کے ذریعے ریلیف دیں گے، وزیر پیٹرولیم

اسلام آباد: وزیر پیٹرولیم علی پرویز ملک نے کہا ہے کہ مستحق افراد کو بینظیر انکم سپورٹ پروگرام (بی آئی ایس پی) کے ڈیٹا کی بنیاد پر ایل پی جی کی قیمتوں میں ریلیف فراہم کیا جائے گا۔

اپنے بیان میں علی پرویز ملک نے کہا کہ عالمی منڈی کے نرخوں کے مطابق ایل پی جی کی قیمت تقریباً 450 روپے فی کلو بنتی ہے، تاہم بعض عناصر نے اس پر منافع خوری کی۔ حکومت عوام کو سستی ایل پی جی فراہم کرنے کے لیے اقدامات کر رہی ہے۔

انہوں نے بتایا کہ ایل پی جی کی درآمد کو مسابقت کی بنیاد پر کھولا جا رہا ہے اور تمام کمپنیوں کو اپنی ویب سائٹس پر ایل پی جی کے نرخ ظاہر کرنا ہوں گے۔ مقامی ایل پی جی کی فراہمی بھی نیلامی کے ذریعے کی جائے گی۔

وزیر پیٹرولیم کا کہنا تھا کہ حکومت کی کوشش ہے کہ دسمبر اور جنوری کے دوران ملک میں گیس کی فراہمی برقرار رکھی جائے۔

دوسری جانب وزیر اطلاعات عطا اللہ تارڑ نے کہا کہ وزیر اعظم کی ہدایت ہے کہ عوام پر اضافی بوجھ نہ پڑے اور انہیں ریلیف فراہم کیا جائے۔ انہوں نے بتایا کہ ایل پی جی سے متعلق فیصلوں کی کابینہ نے منظوری دے دی ہے۔