امریکا کے آبنائے ہرمز میں ایرانی جزیرے قشم پر حملے، دفاعی کارروائی قرار دے دیا

واشنگٹن: امریکی حکام نے تصدیق کی ہے کہ امریکا نے آبنائے ہرمز میں واقع ایران کے جزیرہ قشم پر محدود حملے کیے ہیں، جنہیں دفاعی نوعیت کی کارروائی قرار دیا گیا ہے۔

امریکی حکام کے مطابق ان حملوں کا مقصد امریکی اثاثوں اور تنصیبات کو ایرانی میزائل حملوں سے محفوظ رکھنا تھا۔ ایک امریکی عہدیدار نے بتایا کہ یہ کارروائیاں بڑے پیمانے پر فوجی آپریشن دوبارہ شروع کرنے کا اشارہ نہیں ہیں۔

ایک دوسرے امریکی عہدیدار کے مطابق ایران کی جانب سے امریکی تنصیبات اور اثاثوں کے خلاف زمین سے فضا میں مار کرنے والے میزائل استعمال کیے گئے، جس کے جواب میں جزیرہ قشم پر محدود کارروائی کی گئی۔

اس سے قبل پیر کے روز جزیرہ قشم میں متعدد دھماکوں کی اطلاعات سامنے آئی تھیں، جس کے بعد امریکی حکام نے حملوں کی تصدیق کی۔ امریکی حکام کے بیانات کے مطابق کارروائی کا مقصد فوری خطرات کا جواب دینا تھا۔

تاحال حملوں کی مکمل تفصیلات اور ممکنہ نقصانات کے بارے میں معلومات سامنے نہیں آئیں۔