پی آئی اے کا پہلا جدید بوئنگ ڈریم لائنر طیارہ پاکستان پہنچ گیا

اسلام آباد: قومی ایئرلائن کا پہلا بوئنگ 787-9 ڈریم لائنر طیارہ پاکستان پہنچ گیا۔ لیز پر حاصل کیا گیا جدید طیارہ لندن سے پرواز پی کے 786 کے ذریعے اسلام آباد ایئرپورٹ پہنچا۔

یہ پاکستان کی کسی بھی ایئرلائن کے فضائی بیڑے میں شامل ہونے والا اپنی نوعیت کا پہلا بوئنگ 787-9 طیارہ ہے۔

پی آئی اے کے چیف ایگزیکٹو آفیسر ایئر وائس مارشل عامر حیات نے اپنی ٹیم کے ہمراہ اسلام آباد ایئرپورٹ پر طیارے کا استقبال کیا۔

بوئنگ 787-9 جدید ٹیکنالوجی، دورانِ پرواز تفریحی سہولیات اور کشادہ و آرام دہ کیبن سے لیس ہے۔

ترجمان کے مطابق ڈریم لائنر کی شمولیت قومی ایئرلائن کے فضائی بیڑے کو جدید بنانے اور بین الاقوامی نیٹ ورک کو وسعت دینے کی حکمت عملی کا حصہ ہے۔ اس اقدام کا مقصد مسافروں کو بین الاقوامی معیار کی سفری سہولیات اور زیادہ آرام دہ فضائی سفر فراہم کرنا ہے۔