بیرئر ہٹانے اور کار سرکار میں مداخلت کیس: ایمان مزاری اور ہادی علی چٹھہ کو 13, 13 سال قید کی سزا

اسلام آباد کی انسدادِ دہشت گردی عدالت نے بیریئر ہٹانے اور کارِ سرکار میں مداخلت کے مقدمے میں ایمان مزاری اور ہادی علی چٹھہ کو مجموعی طور پر 13، 13 سال قید کی سزا سنا دی۔ عدالت نے دونوں پر جرمانے بھی عائد کیے۔

فیصلہ اڈیالہ جیل میں عدالت کے جج طاہر عباس سپرا نے سنایا۔ عدالتی حکم کے مطابق دونوں کو دہشت گردی سے متعلق دفعہ کے تحت 10 سال قید اور ایک لاکھ روپے جرمانہ، دفعہ 353 کے تحت 2 سال قید اور 50 ہزار روپے جرمانہ، جبکہ دفعہ 186 کے تحت ایک سال قید اور 50 ہزار روپے جرمانے کی سزا دی گئی۔

عدالت نے سزاؤں سے متعلق قانونی رعایت دیتے ہوئے قرار دیا کہ دونوں کو مجموعی طور پر 10 سال قید کاٹنا ہوگی۔ فیصلہ سنائے جانے کے بعد ایمان مزاری اور ہادی علی چٹھہ کو جیل حکام نے تحویل میں لے لیا۔

مقدمہ 25 اکتوبر 2024 کو درج کیا گیا تھا، جبکہ دونوں کے خلاف 7 اکتوبر کو فردِ جرم عائد ہونے کے بعد باقاعدہ ٹرائل شروع ہوا تھا۔