سوشل میڈیا پر مؤثر فعالیت موجودہ وقت کی اہم ضرورت ہے، مولوی عبدالوکیل حقیار

کارکنان و سوشل میڈیا کے ورکرز تنظیمی پیغام کو ذمہ داری کے ساتھ عام کریں، مولوی فضل الرحمان
جمعیت علماء اسلام پاکستان (بلوچستان ) کے صوبائی میڈیا کوآرڈینیٹر مولوی عبدالوکیل حقیار اور ڈپٹی میڈیا کوآرڈینیٹر مولوی فضل الرحمان نے اپنے مشترکہ بیان میں کہا ہے کہ موجودہ دور میں سوشل میڈیا عوام تک تنظیمی مؤقف، سیاسی و فکری پیغام اور مثبت سرگرمیوں کو پہنچانے کا ایک مؤثر ذریعہ ہے۔ اس لیے جمعیت علماء اسلام پاکستان (بلوچستان) کے تمام ذمہ داران اور کارکنان سوشل میڈیا پر اپنی فعالیت کو مؤثر، منظم اور باقاعدہ بنائیں۔

انہوں نے کہا کہ تنظیمی سرگرمیوں، اجلاسوں، تربیتی اجتماعات، پریس کانفرنسوں بالخصوص رہبرجمعیت مولنا محمدخان شیرانی کے پیغام اورانکے اہم بیانات کو مستند معلومات کے ساتھ عوام تک پہنچانا ڈیجیٹل میڈیا سیل کی اہم ذمہ داری ہے۔ تمام کارکنان سوشل میڈیا کے استعمال میں اخلاقیات، ذمہ داری اور تنظیمی نظم و ضبط کا خیال رکھیں۔

مولوی عبدالوکیل حقیار نے مزید کہا کہ غیر مصدقہ خبروں، غیر ذمہ دارانہ تبصروں اور اشتعال انگیز مواد سے اجتناب کیا جائے، جبکہ سرپرست تنظیم کے مؤقف اور سرگرمیوں کی تشہیر مثبت، مؤثر اور باوقار انداز میں کی جائے۔

انہوں نے تمام ضلعی، تحصیلی اور یونٹ سطح کے میڈیا ذمہ داران پر زور دیا کہ وہ اپنی سرگرمیوں کی بروقت رپورٹنگ کریں اور تصاویر، ویڈیوز اور پریس ریلیز صوبائی ڈیجیٹل میڈیا سیل تک پہنچائیں، تاکہ تنظیمی پیغام کو وسیع پیمانے پر عوام تک پہنچایا جا سکے۔ اور عنقریب تمام اضلاع میں ڈیجیٹل میڈیا کے کوآرڈینیٹر کا انتخاب عمل میں لایاجائیگا اسی سلسلے میں اضلاع کے سرپرست جماعت کے ساتھ مشاورت جاری ہے
انہوں نے مزید کہا کہ عنقریب صوبائی ڈیجیٹل میڈیا کے زیراہتمام صوبائی ڈیجیٹل میڈیا ٹیم کے حلف برداری تقریب ہوگی، جس سے جمعیت علماء اسلام کے ذمہ دار احباب اور ڈیجیل میڈیا کے احباب شرکت کرینگے