سیکیورٹی فورسز کی بلوچستان میں کارروائیاں، فتنۃ الخوارج کا دہشتگرد کمانڈ رعادل شاہ عرف درویش ہلاک

کوئٹہ: سیکیورٹی ذرائع کے مطابق بلوچستان کے ضلع قلعہ سیف اللہ میں انٹیلی جنس بیسڈ آپریشن کے دوران فتنۃ الخوارج سے تعلق رکھنے والا دہشت گرد کمانڈر عادل شاہ عرف درویش ہلاک ہوگیا۔

ذرائع کے مطابق عادل شاہ دسمبر 2020 سے اس گروہ سے وابستہ تھا، جبکہ 2024 سے گروہ کے مالی معاملات کی نگرانی بھی کر رہا تھا۔ وہ مبینہ طور پر غیر مقامی دہشت گردوں کو ژوب، شیرانی اور شعبان میں رہائش فراہم کرنے میں مدد کرتا رہا۔

سیکیورٹی ذرائع کا کہنا ہے کہ عادل شاہ 2022 اور 2023 کے دوران سیکیورٹی فورسز پر حملوں اور اغوا برائے تاوان کے لیے بھتہ خوری میں بھی ملوث رہا۔ اس کے خلاف انسداد دہشت گردی کی عدالتوں میں 19 ایف آئی آرز درج ہونے کا دعویٰ کیا گیا ہے، جبکہ اس کے سر کی قیمت 25 لاکھ روپے مقرر تھی۔

ذرائع کے مطابق بلوچستان میں آپریشن ردالفتنہ 3 کے تحت دہشت گردی کے خلاف کارروائیاں جاری ہیں۔ سیکیورٹی فورسز نے آخری دہشت گرد کے خاتمے تک کارروائیاں جاری رکھنے کے عزم کا اظہار کیا ہے۔