نیتن یاہو قیادت کے اہل نہیں رہے، اسرائیلی اپوزیشن رہنما کی سخت تنقید

تل ابیب: اسرائیلی اپوزیشن رہنما گادی آئزن کوٹ نے وزیراعظم بینجمن نیتن یاہو کو شدید تنقید کا نشانہ بناتے ہوئے کہا ہے کہ وہ اب ملک کی قیادت کرنے کے اہل نہیں رہے۔

اپوزیشن جماعت یشار کے سربراہ اور اسرائیلی فوج کے سابق چیف آف اسٹاف گادی آئزن کوٹ نے نیتن یاہو کے معاشی منصوبوں پر تنقید کرتے ہوئے کہا کہ وزیراعظم اسرائیل کو عالمی مالیاتی نظام سے دور لے جانے کی سمت بڑھ رہے ہیں، جس کے معیشت، قومی سلامتی اور عالمی تعلقات پر منفی اثرات مرتب ہوسکتے ہیں۔

آئزن کوٹ نے ممکنہ بین الاقوامی پابندیوں سے نمٹنے کے لیے کرپٹو کرنسی اور بلاک چین پر مبنی متبادل ادائیگیوں کے نظام کی تیاری کے منصوبے پر بھی اعتراض کیا۔ انہوں نے طنزیہ انداز میں اسے ’’بی بی کوائن‘‘ کا نام دیا اور خدشہ ظاہر کیا کہ عالمی بینکاری نظام سے دوری اسرائیلی کمپنیوں، سرمایہ کاری اور روزگار کو نقصان پہنچا سکتی ہے۔

یہ بیان اسرائیل میں 27 اکتوبر کو ہونے والے عام انتخابات سے چند روز قبل سامنے آیا ہے۔ آئزن کوٹ انتخابی مہم کے دوران نیتن یاہو کی جنگی حکمت عملی اور طویل عرصے سے جاری فوجی کارروائیوں پر بھی سوالات اٹھاتے رہے ہیں۔

اسرائیلی اپوزیشن رہنما کا مؤقف ہے کہ تین سالہ جنگ کے بعد نیتن یاہو کسی نئی ایران مخالف فوجی کارروائی کی قیادت کرنے کے اہل نہیں، جبکہ اسرائیل کے موجودہ مسائل کا حل مزید جنگ کے بجائے مختلف سیاسی اور سکیورٹی حکمت عملی اپنانے میں ہے۔