ہمارے لیے پاکستان کے ساتھ تعلقات برقرار رکھنا ضروری ہے، امریکی وزیر خارجہ مارکو روبیو

ممبئی: امریکی وزیر خارجہ مارکو روبیو نے کہا ہے کہ پاکستان کی جوہری صلاحیت اور جغرافیائی اہمیت کے باعث امریکا کے لیے اسلام آباد کے ساتھ رابطے اور تعلقات برقرار رکھنا ضروری ہے۔

بھارتی ٹی وی نیٹ ورک 18 کو انٹرویو دیتے ہوئے مارکو روبیو کا کہنا تھا کہ امریکی وزیر خارجہ کی حیثیت سے انہیں ایسے ممالک کے ساتھ بھی سفارتی تعلقات قائم رکھنے ہوتے ہیں جن کے ساتھ بعض معاملات پر اختلافات موجود ہوں۔

انہوں نے پاکستان کے ساتھ امریکی تعلقات کا موازنہ بھارت کے ایران کے ساتھ روابط سے کرتے ہوئے کہا کہ جس طرح بھارت کے لیے ایران کے ساتھ تعلقات برقرار رکھنا اہم ہے، اسی طرح امریکا کے لیے بھی پاکستان کے ساتھ رابطہ رکھنا ضروری ہے۔

روبیو کے مطابق مختلف ممالک کے ساتھ تعلقات میں توازن برقرار رکھنا آسان نہیں، تاہم یہ امریکی خارجہ پالیسی کا لازمی حصہ ہے۔ انہوں نے کہا کہ پاکستان کے ساتھ رابطہ برقرار رکھنے سے واشنگٹن کو ایسے اقدامات کی حوصلہ شکنی میں مدد مل سکتی ہے جن پر بھارت کو تشویش ہے۔

امریکی وزیر خارجہ نے واضح کیا کہ امریکا دنیا میں کہیں بھی دہشت گردی اور اس کی سرپرستی کی مخالفت کرتا ہے۔ ان کے یہ بیانات پاکستان اور امریکا کے سفارتی تعلقات اور خطے میں بدلتی صورت حال کے تناظر میں سامنے آئے ہیں۔