راجن پور مسافر بس حادثہ؛ مزید ایک بچہ دم توڑ گیا، جاں بحق افراد کی تعداد 10 ہوگئی، 30 زخمی

راجن پور: انڈس ہائی وے پر بنگلہ ہدایت کے قریب مسافر بس کے خوفناک حادثے میں مزید ایک بچہ دم توڑ گیا، جس کے بعد جاں بحق افراد کی تعداد 10 ہوگئی، جبکہ 30 مسافر زخمی ہوئے ہیں۔ زخمیوں میں چار افراد کی حالت تشویشناک بتائی گئی ہے۔

ریسکیو حکام کے مطابق کراچی سے ڈیرہ غازی خان جانے والی مسافر بس بنگلہ ہدایت کے قریب ڈیوائیڈر سے ٹکرا کر الٹ گئی۔ حادثے کی اطلاع ملتے ہی ریسکیو 1122 کی ٹیمیں جائے وقوعہ پر پہنچ گئیں اور امدادی کارروائیاں شروع کردیں۔

حکام کے مطابق زخمیوں کو اسپتال منتقل کیا گیا، جبکہ معمولی زخمی ہونے والے مسافروں کو جائے حادثہ پر طبی امداد فراہم کی گئی۔ حادثے کے بعد زخمیوں کو فوری طبی سہولیات فراہم کرنے کے لیے اقدامات کیے گئے۔

وزیراعلیٰ پنجاب مریم نواز شریف نے حادثے میں قیمتی انسانی جانوں کے ضیاع پر افسوس کا اظہار کرتے ہوئے زخمیوں کے بہترین علاج کی ہدایت کی ہے۔