کوئٹہ۔ ایم پی اے زرک خان مندوخیل کی قیادت میں خیبر پختونخوا میں گورنر راج کے نفاذ کی حمایت میں ریلی، کارکنوں کا جشن، مٹھائیاں تقسیم

پاکستان مسلم لیگ (ن) کے زیرِ اہتمام خیبر پختونخوا میں گورنر راج کے نفاذ کی حمایت میں کوئٹہ میں ریلی نکالی گئی، جس کی قیادت مسلم لیگی ایم پی اے زرک خان مندوخیل نے کی۔ ریلی میں مسلم لیگ (ن) کے کارکنوں کی بڑی تعداد نے شرکت کی اور پاکستانی پرچم اٹھا کر وفاقی حکومت کے فیصلے کی حمایت کا اظہار کیا اس موقع پر کارکنوں نے ڈھول کی تھاپ پر بھنگڑے ڈالے، مٹھائیاں تقسیم کیں اور پاکستان کے حق میں نعرے لگائے۔ شرکاء نے گورنر راج کے نفاذ کے فیصلے پر خوشی کا اظہار کرتے ہوئے اسے ملکی استحکام کے تناظر میں اہم اقدام قرار دیا ریلی سے خطاب کرتے ہوئے ایم پی اے زرک خان مندوخیل نے کہا کہ ملک میں امن و امان کا قیام اور عوام کے جان و مال کا تحفظ اولین ترجیح ہونی چاہیے۔ انہوں نے کہا کہ سیاسی انتشار اور احتجاج کی سیاست ملکی ترقی کی راہ میں رکاوٹ بنتی ہے، جبکہ پاکستان کا استحکام اور قومی سلامتی ہم سب کی مشترکہ ذمہ داری ہے۔ زرک خان مندوخیل نے مزید کہا کہ ملکی ترقی، امن اور استحکام کے لیے تمام سیاسی جماعتوں کو اپنا مثبت کردار ادا کرنا چاہیے اور قومی مفاد کو ترجیح دینی چاہیے۔ ریلی کے شرکاء نے خیبر پختونخوا میں گورنر راج کے نفاذ کے فیصلے کی حمایت کا اظہار کرتے ہوئے ملک میں امن، استحکام اور قومی یکجہتی کے لیے اپنے عزم کا اعادہ کیا۔