میرپور ماتھیلو میں پہلے سونا انٹر ڈسٹرکٹ اسپورٹس گالا کا افتتاح

میرپور ماتھیلو میں پہلے سونا انٹر ڈسٹرکٹ اسپورٹس گالا کا افتتاح، کرکٹ، فٹ بال اور تھرو بال کے مقابلوں میں 33 ٹیمیں شریک ہوں گی

گھوٹکی (رپورٹ: وحید منظر) فوجی فرٹیلائزر کمپنی (ایف ایف سی) اور سونا ویلفیئر فاؤنڈیشن کے تعاون سے سونا پبلک اسکول اینڈ کالج میرپور ماتھیلو میں پہلے سونا انٹر ڈسٹرکٹ اسپورٹس گالا کا افتتاح کر دیا گیا۔

تقریب کا افتتاح ایف ایف سی کے جنرل منیجر خرم سلیم اور ڈپٹی ڈائریکٹر اسپورٹس سکھر ڈویژن میر محمد کلہوڑو نے کیا۔

اس موقع پر خرم سلیم نے کہا کہ کھیل نوجوانوں میں نظم و ضبط، ٹیم ورک اور قائدانہ صلاحیتوں کو فروغ دینے میں اہم کردار ادا کرتے ہیں۔ انہوں نے کہا کہ کھیلوں کی سرگرمیاں نوجوانوں کی جسمانی اور ذہنی نشوونما کے ساتھ ساتھ ان میں مثبت سوچ اور صحت مند مسابقت کا جذبہ بھی پیدا کرتی ہیں۔

اسپورٹس گالا میں کرکٹ، فٹ بال اور تھرو بال کے مقابلے منعقد کیے جائیں گے، جن میں مجموعی طور پر 33 ٹیمیں حصہ لیں گی۔ مقابلوں کا آغاز 9 اکتوبر سے ہو چکا ہے، جبکہ فائنل میچز 14 اکتوبر کو کھیلے جائیں گے۔

اس اسپورٹس گالا کو نوجوانوں میں کھیلوں کے فروغ، ان کی صلاحیتوں کو اجاگر کرنے اور مختلف اضلاع کے کھلاڑیوں کو اپنی کارکردگی دکھانے کے مواقع فراہم کرنے کے حوالے سے ایک اہم اقدام قرار دیا جا رہا ہے۔