بلوچستان فوڈ ڈیپارٹمنٹ کے اربوں روپے کے اخراجات پر بڑا آڈٹ اعتراض

کوئٹہ: آڈیٹر جنرل آف پاکستان نے بلوچستان فوڈ ڈیپارٹمنٹ کے 8 ارب 43 کروڑ 10 لاکھ روپے کے اخراجات پر اعتراضات اٹھا دیے ہیں، جبکہ حکومتی ذرائع کے مطابق آڈٹ رپورٹ میں 5 ارب 98 کروڑ 20 لاکھ روپے کے اخراجات کو بے ضابطہ قرار دیا گیا ہے۔

حکومتی ذرائع کے مطابق فوڈ ڈیپارٹمنٹ کے اخراجات سے متعلق آڈٹ رپورٹ میں مختلف بے ضابطگیوں کی نشاندہی کی گئی ہے، جس کے باعث سرکاری خزانے کو 2 کروڑ 44 لاکھ 80 ہزار روپے کا نقصان بھی ہوا۔

ذرائع کے مطابق ژوب مرکز میں بھی قومی خزانے کو 2 کروڑ 44 لاکھ روپے سے زائد کا نقصان پہنچا۔ آڈٹ رپورٹ میں بتایا گیا ہے کہ بروقت اقدامات نہ کیے جانے کے باعث ژوب مرکز میں موجود گندم استعمال کے قابل نہیں رہی، جس سے سرکاری خزانے کو مالی نقصان برداشت کرنا پڑا۔

آڈٹ رپورٹ میں نقصان کے ذمہ دار افراد کا تعین کرنے اور غفلت کے مرتکب افسران کے خلاف کارروائی کے لیے انکوائری کی سفارش بھی کی گئی ہے۔

حکومتی ذرائع کے مطابق فوڈ ڈیپارٹمنٹ کے اخراجات اور نشاندہی کی گئی بے ضابطگیوں سے متعلق مزید کارروائی آڈٹ رپورٹ کی سفارشات کی روشنی میں کی جائے گی۔