سرکاری ملازمین کے لیے بڑی خوشخبری! خیبر پختونخوا حکومت کا ‘صحت کارڈ پلس’ میں تاریخی سہولیات دینے کا اعلان

پشاور: خیبر پختونخوا حکومت نے ‘صحت کارڈ پلس’ کے تحت سرکاری ملازمین کو مزید طبی سہولیات فراہم کرنے کی تجویز دی ہے۔

تفصیلات کے مطابق، وزیراعلیٰ خیبر پختونخوا سہیل آفریدی کی زیر صدارت صحت کارڈ پلس کے حوالے سے ایک اجلاس منعقد ہوا، جس میں اس پروگرام کو مزید منظم، موثر اور پائیدار بنانے کے لیے مختلف تجاویز پر غور کیا گیا۔

اجلاس میں صحت کارڈ کے تحت مہنگے علاج کی کوریج اور سروس ریٹس میں اضافے کی تجویز دی گئی، جبکہ سرکاری ملازمین کے لیے صحت کارڈ کے تحت ‘ٹاپ اپ ہیلتھ پیکیج’ متعارف کرانے کی تجویز بھی سامنے آئی۔

اس موقع پر گفتگو کرتے ہوئے وزیراعلیٰ سہیل آفریدی نے کہا کہ پی ٹی آئی کے بانی عمران خان کے وژن کے مطابق صحت اور تعلیم حکومت کی اولین ترجیحات میں شامل ہیں۔

انہوں نے کہا کہ بنیادی صحت کے مراکز میں اصلاحات اور جدت لانے کا مقصد عوام کو ان کی دہلیز پر بہتر طبی سہولیات کی فراہمی ہے۔ لوگوں کو بہترین صحت کی سہولیات فراہم کرنا حکومت کا بنیادی مقصد ہے۔

وزیراعلیٰ نے متعلقہ حکام کو صحت اور تعلیم کے مسائل بروقت حل کرنے کی ہدایت کی اور کہا کہ ان امور میں تاخیر کی کوئی گنجائش نہیں ہے۔ انہوں نے صحت کارڈ کی سہولت کے غلط استعمال کو روکنے کے لیے بھی موثر اقدامات اٹھانے کی ہدایت کی۔