امریکا کا ایران کے 5 آئل ٹینکرز تباہ کرنے کا دعویٰ، حملے کی ویڈیوز بھی جاری کر دیں

اسلام آباد: امریکی سینٹرل کمانڈ (سینٹکام) نے دعویٰ کیا ہے کہ امریکی فورسز نے ایران کے خام تیل سے لدے 5 آئل ٹینکرز کو تباہ کردیا ہے۔

سینٹکام کے مطابق ایرانی ٹینکرز کے خلاف کارروائی پاسداران انقلاب کی جانب سے دو روز کے دوران امریکی جنگی بحری جہاز کو بیلسٹک میزائلوں سے دو مرتبہ نشانہ بنانے کی کوشش کے بعد کی گئی۔

امریکی کمانڈ کا کہنا ہے کہ امریکی بحری جہاز نے ایرانی میزائل حملوں کی کوششیں ناکام بنادیں اور کسی امریکی اہلکار کو نقصان نہیں پہنچا۔ امریکی فورسز نے کارروائی کی ویڈیوز بھی جاری کردی ہیں۔

امریکی وزیر خارجہ مارکو روبیو نے ایران کو خبردار کیا ہے کہ اگر تہران نے امریکی جنگی بحری جہازوں کو نشانہ بنانے کی کوشش کی تو اسے اپنے آئل ٹینکرز سے محروم ہونا پڑے گا۔

دوسری جانب ایرانی سرکاری میڈیا نے دعویٰ کیا ہے کہ ایران نے اردن میں امریکی اہداف کو میزائلوں سے نشانہ بنایا، تاہم امریکی سینٹرل کمانڈ نے اردن میں امریکی ایئربیس پر مبینہ حملے سے متعلق فوری طور پر کوئی تفصیلات فراہم نہیں کیں۔