حکومت نے عمران خان کی اسپتال منتقلی کے کیس میں دوبارہ نظرثانی درخواست دائر کردی

اسلام آباد: وفاقی حکومت نے بانی پی ٹی آئی عمران خان کو اسپتال منتقل کرنے سے متعلق عدالتی فیصلے کے خلاف دوبارہ نظرثانی درخواست دائر کردی۔

ذرائع کے مطابق چیف کمشنر اسلام آباد کی جانب سے متفرق نظرثانی درخواست دائر کی گئی ہے، جس میں رجسٹرار آفس کے اعتراضات دور کرنے کے بعد درخواست دوبارہ جمع کرائی گئی۔

درخواست میں مؤقف اختیار کیا گیا ہے کہ عمران خان کو اسپتال منتقل کرنے سے متعلق 18 اگست کے عدالتی فیصلے میں سقم موجود ہیں اور جیل رولز کو نظر انداز کیا گیا۔

حکومت نے مؤقف اپنایا کہ مرکزی کیس میں وفاقی حکومت کو فریق نہیں بنایا گیا، اس لیے عدالت سے درخواست کی گئی ہے کہ متفرق درخواست منظور کرتے ہوئے 18 اگست کے فیصلے پر نظرثانی کی جائے۔

درخواست میں عدالت سے نظرثانی کی اجازت دینے اور سابقہ فیصلے کا دوبارہ جائزہ لینے کی استدعا کی گئی ہے۔