پاک سعودی ترک دفاعی معاہدہ خطے میں امریکا کیلئے بدلتی سوچ کی علامت ہے، ایرانی وزارت خارجہ

تہران: ایرانی وزارت خارجہ نے پاکستان، سعودی عرب اور ترکیہ کے درمیان ہونے والے دفاعی معاہدے کو خطے میں امریکا کے حوالے سے بدلتی ہوئی سوچ کی علامت قرار دیا ہے۔

ایرانی وزارت خارجہ کے ترجمان اسماعیل بقائی نے کہا کہ خطے کے ممالک اب اپنی سلامتی کے لیے بیرونی طاقتوں پر مکمل انحصار کے بجائے علاقائی تعاون اور باہمی دفاعی صلاحیتوں کو اہمیت دے رہے ہیں۔

ان کے مطابق گزشتہ چند برسوں کے تجربات سے خطے کے ممالک اس نتیجے پر پہنچے ہیں کہ پائیدار سلامتی بیرونی طاقتوں پر انحصار کے بجائے زمینی حقائق کو مدنظر رکھتے ہوئے علاقائی سطح پر کیے جانے والے مؤثر اقدامات سے ہی ممکن ہے۔

اسماعیل بقائی نے کہا کہ ایسے اقدامات خطے میں امن و استحکام کے قیام اور عدم استحکام کی روک تھام میں مددگار ثابت ہوسکتے ہیں۔ ان کا مزید کہنا تھا کہ علاقائی تعاون اسرائیل سے پیدا ہونے والے خطرات اور عدم استحکام سے نمٹنے میں بھی کردار ادا کرسکتا ہے۔

ایرانی وزارت خارجہ کے ترجمان کے بیان کے مطابق تہران پاکستان، سعودی عرب اور ترکیہ کے درمیان بڑھتے ہوئے دفاعی تعاون کو خطے کے بدلتے ہوئے سیکیورٹی منظرنامے کے تناظر میں دیکھ رہا ہے۔