کوئٹہ: ہسپتالوں میں بغیر اجازت رپورٹنگ اور فوٹوگرافی پر پابندی

کوئٹہ: بلوچستان ہیلتھ کیئر کمیشن نے صوبائی دارالحکومت کوئٹہ کے تمام سرکاری و نجی اسپتالوں میں خلافِ قانون رپورٹنگ، ویڈیو بنانے اور فوٹو گرافی کرنے پر مکمل پابندی عاید کر دی ہے۔ کمیشن کی جانب سے جاری کردہ اعلامیے کے مطابق، یہ فیصلہ مریضوں کی پرائیویسی اور طبی خدمات کی بلا تعطل فراہمی کو یقینی بنانے کے لیے کیا گیا ہے۔

ہیلتھ کیئر کمیشن کا کہنا ہے کہ بعض میڈیا نمائندے اور سوشل میڈیا پروڈیوسرز بغیر اجازت اسپتالوں کے حساس شعبوں (جیسے آئی سی یو، آپریشن تھیٹر اور ایمرجنسی) میں داخل ہو کر کوریج کرتے ہیں، جس سے نہ صرف علاج کا عمل متاثر ہوتا ہے بلکہ مریضوں کی پرائیویسی کی بھی سنگین خلاف ورزی ہوتی ہے۔ انتظامیہ نے واضح کیا ہے کہ آئندہ کسی بھی قسم کی کوریج کے لیے متعلقہ اسپتال انتظامیہ کی تحریری اجازت لازمی ہوگی اور ورنہ خلاف ورزی کرنے والوں کے خلاف قانونی کارروائی کی جائے گی۔