اسما جتک کے والد کے قتل پر بلوچستان اسمبلی میں احتجاج، علی مدد جتک اور یونس زہری کا واک آؤٹ

کوئٹہ: اسما جتک کے والد کے قتل کے معاملے پر بلوچستان اسمبلی میں احتجاج کیا گیا، جس کے بعد صوبائی وزیر علی مدد جتک اور اپوزیشن لیڈر یونس زہری نے ایوان سے واک آؤٹ کر دیا۔

صوبائی وزیر علی مدد جتک نے کہا کہ واقعے کو دو روز گزرنے کے باوجود تاحال ایف آئی آر درج نہیں کی جا رہی، جو باعثِ تشویش ہے۔

اسپیکر بلوچستان اسمبلی نے معاملے کا نوٹس لیتے ہوئے آئی جی پولیس بلوچستان، ڈی آئی جی اور ایس پی خضدار کو کل طلب کر لیا۔

جماعت اسلامی بلوچستان کے امیر مولانا ہدایت الرحمٰن بلوچ نے کہا کہ ایس پی کو طلب کرنے کے بجائے قاتلوں کی گرفتاری کے لیے اقدامات کیے جائیں۔ انہوں نے الزام عائد کیا کہ اسما جتک کے والد کے قاتل کا سب کو علم ہے مگر کوئی نام لینے کو تیار نہیں۔

مولانا ہدایت الرحمٰن بلوچ نے خضدار واقعے پر صوبائی وزیر داخلہ میر ضیاء اللہ لانگو سے استعفیٰ دینے کا بھی مطالبہ کیا۔