گڈز ٹرانسپورٹرز کے بعد آل پاکستان ٹرانسپورٹرز ایسوسی ایشن کا بھی 8اگست سے ہڑتال کا اعلان

اسلام آباد: گڈز ٹرانسپورٹرز کے بعد آل پاکستان ٹرانسپورٹرز ایسوسی ایشن نے بھی 8 اگست سے ملک گیر ہڑتال کا اعلان کر دیا ہے۔

نیشنل پریس کلب اسلام آباد میں پریس کانفرنس کرتے ہوئے ٹرانسپورٹرز رہنماؤں نے کہا کہ ڈیزل کی قیمتوں میں روزانہ تبدیلی سے کاروبار کرنا مشکل ہوگیا ہے، جبکہ ٹول ٹیکس اور ود ہولڈنگ ٹیکس میں اضافے نے مسائل مزید بڑھا دیے ہیں۔

عہدیداران کا کہنا تھا کہ ٹول ٹیکس میں اضافے کو واپس لیا جائے اور ود ہولڈنگ ٹیکس کی شرح کم کی جائے۔ انہوں نے مطالبہ کیا کہ ٹرانسپورٹرز کو درپیش دیگر مسائل، ایکسل لوڈ، لائسنسنگ اور جرمانوں کے معاملات بھی حل کیے جائیں۔

ٹرانسپورٹرز رہنماؤں نے خبردار کیا کہ اگر مطالبات تسلیم نہ کیے گئے تو 8 اگست کو ملک بھر میں پہیہ جام ہڑتال کی جائے گی۔

دوسری جانب آل پاکستان گڈز ٹرانسپورٹ اتحاد نے بھی 8 اگست کی ہڑتال کی حمایت کرتے ہوئے حکومت سے مطالبات منظور کرنے کا مطالبہ کیا ہے۔