مستونگ حملہ: صوبائی وزیر صحت بخت محمد کاکڑ کی سیشن جج اور محافظ کی شہادت کی مذمت

کوئٹہ: صوبائی وزیر صحت بخت محمد کاکڑ نے مستونگ میں سیشن جج عبدالحکیم کاکڑ اور ان کے محافظ کی شہادت پر شدید افسوس اور مذمت کا اظہار کیا ہے۔

اپنے بیان میں بخت محمد کاکڑ نے کہا کہ ریاست اور اس کے ادارے امن دشمن عناصر کا آخری حد تک پیچھا کریں گے۔ انہوں نے کہا کہ بلوچستان کے امن کے لیے قربانیاں دینے والے شہداء ہمارے ماتھے کا جھومر ہیں۔

صوبائی وزیر صحت کا کہنا تھا کہ بے گناہوں کا ناحق خون بہانے والے عناصر جلد اپنے انجام کو پہنچیں گے اور دہشت گردی کے خلاف جنگ جاری رہے گی۔

انہوں نے مزید کہا کہ دکھ اور مشکل کی اس گھڑی میں وہ سوگوار خاندان کے غم میں برابر کے شریک ہیں اور شہداء کی قربانیاں ہمیشہ یاد رکھی جائیں گی۔