حوثیوں کی سعودی عرب اور بحیرہ احمر میں تجارتی جہازرانی کے خلاف دھمکیوں کی پاکستان کی شدید مذمت

اسلام آباد: پاکستان نے حوثی ملیشیا کی جانب سے سعودی عرب اور بحیرہ احمر میں تجارتی جہازرانی کے خلاف دھمکیوں کو سختی سے مسترد کرتے ہوئے تشویش کا اظہار کیا ہے۔

دفتر خارجہ کے ترجمان کے مطابق ایسی دھمکیاں علاقائی سلامتی، عالمی تجارت اور سمندری آمدورفت کی آزادی کے لیے سنگین خطرہ ہیں، جبکہ قانونی تجارتی سرگرمیوں میں مصروف جہازوں کو نشانہ بنانا ناقابل قبول ہے۔

ترجمان نے کہا کہ پاکستانی پرچم بردار جہازوں یا پاکستان کے سمندری مفادات کے خلاف کسی بھی جارحانہ کارروائی کو قومی سلامتی اور خودمختار مفادات کے لیے خطرہ تصور کیا جائے گا۔

پاکستان نے کہا کہ وہ اپنے سمندری اثاثوں اور قومی مفادات کے تحفظ کے لیے تمام ضروری اقدامات کا حق محفوظ رکھتا ہے۔

دفتر خارجہ نے سعودی عرب کی سلامتی، خودمختاری اور علاقائی سالمیت کے لیے حمایت کا اعادہ کرتے ہوئے تمام فریقوں پر زور دیا کہ وہ کشیدگی میں کمی، مذاکرات اور بین الاقوامی قانون کی پاسداری کو یقینی بنائیں۔