چینی کمپنی کی پاکستان کے انفرا اسٹرکچر شعبے میں سرمایہ کاری میں دلچسپی

اسلام آباد: چینی کمپنی شینڈونگ ہائی اسپیڈ گروپ نے پاکستان کے انفرا اسٹرکچر، ٹرانسپورٹ، لاجسٹکس اور کنیکٹیوٹی منصوبوں میں سرمایہ کاری میں دلچسپی کا اظہار کیا ہے۔

وفاقی وزیر سرمایہ کاری قیصر احمد شیخ نے شینڈونگ ہائی اسپیڈ گروپ کے چیئرمین شو ژیانگ کی قیادت میں چینی وفد سے ملاقات کی، جس میں پاکستان میں سرمایہ کاری کے نئے مواقع پر تبادلہ خیال کیا گیا۔

ملاقات کے دوران چینی وفد کو پاکستان میں جاری سرمایہ کاری سرگرمیوں، او جی ڈی سی ایل کے اشتراک سے حیدرآباد میں جاری تیل و گیس منصوبے سمیت مختلف منصوبوں سے آگاہ کیا گیا۔

وفاقی وزیر نے پاکستان کے بہتر ہوتے کاروباری ماحول، نوجوان افرادی قوت اور انفرا اسٹرکچر شعبے میں موجود مواقع کو اجاگر کرتے ہوئے چینی سرمایہ کاروں کو مکمل تعاون کی یقین دہانی کرائی۔

حکام کے مطابق اسپیشل انویسٹمنٹ فیسلٹی کونسل (ایس آئی ایف سی) کی سہولت کاری سے پاکستان میں غیر ملکی سرمایہ کاری اور پاک چین اقتصادی تعاون کے فروغ کے نئے امکانات پیدا ہو رہے ہیں۔